वीरगन्ज-
राष्ट्रिय स्वतन्त्र पार्टी (रास्वपा) का सभापति रवि लामिछाने आजदेखि भारत भ्रमणमा जाँदैछन्। भारतीय जनता पार्टी (भाजपा) को औपचारिक निमन्त्रणामा हुन लागेको उनको भ्रमणलाई नेपालको वर्तमान राजनीतिक तथा कूटनीतिक सन्दर्भमा विशेष महत्वका साथ हेरिएको छ।
प्रधानमन्त्री बालेन्द्र शाहले हालै सार्वजनिक रूपमा “नेपालले पनि भारतको भूमि मिचेको छ” भन्ने अभिव्यक्ति दिएपछि देशभर त्यसको चर्को विरोध भइरहेको छ। प्रमुख राजनीतिक दल, राष्ट्रवादी वृत्त तथा सामाजिक सञ्जालमा प्रधानमन्त्रीको उक्त भनाइलाई लिएर तीव्र बहस चलिरहेका बेला सत्तारुढ दलका सभापति लामिछानेको भारत भ्रमण सुरु हुन लागेको हो।
नेपाल–भारत सम्बन्ध, सीमा विवाद तथा दुई देशबीचको कूटनीतिक संवेदनशीलता चर्चामा रहेका बेला हुन लागेको यो भ्रमणलाई सामान्य राजनीतिक भ्रमणभन्दा बढी अर्थपूर्ण रूपमा हेरिएको छ। विशेषगरी पछिल्लो समय नेपाल–भारत सम्बन्धका विषयमा उठेका प्रश्न तथा प्रधानमन्त्रीको अभिव्यक्तिले सिर्जना गरेको राजनीतिक तरंगबीच भारतीय सत्तारुढ दलको निमन्त्रणामा हुन लागेको भ्रमणले थप चासो बढाएको छ।
रास्वपाका अनुसार भ्रमणका क्रममा लामिछानेले भारतीय राजनीतिक नेतृत्वसँग भेटघाट गर्ने, विभिन्न कार्यक्रमहरूमा सहभागी हुने तथा भारतमा रहेका नेपाली समुदायसँग संवाद गर्ने कार्यक्रम रहेको छ। भ्रमणलाई दुई देशका राजनीतिक दलबीच सम्बन्ध विस्तार तथा आपसी समझदारी अभिवृद्धिको अवसरका रूपमा समेत हेरिएको छ।
लामिछानेसँगै उनकी पत्नी निकिता पौडेल, रास्वपाका सहमहामन्त्री विपिन आचार्य, विदेश विभाग प्रमुख दीपक बोहोरा तथा प्रदीप आचार्य पनि भारत गएका छन्।
सत्तारुढ गठबन्धनका प्रभावशाली नेतामध्ये एक मानिने लामिछानेको यो भ्रमणले नेपाल–भारत सम्बन्ध, आन्तरिक राजनीतिक सन्देश तथा आगामी कूटनीतिक समीकरणमा समेत प्रभाव पार्न सक्ने आकलन राजनीतिक वृत्तमा गरिएको छ।
