गणेश शंकर/रक्सौल-
भारतीय प्रधानमन्त्री नरेन्द्र मोदी लगातार सबैभन्दा लामो युगीन अवधिसम्म देशको सेवा गर्ने निर्वाचित प्रधानमन्त्री बनेको अवसरमा नेपाल–भारत सीमावर्ती सहर रक्सौलमा भव्य खुसीयाली मनाइएको छ। यस ऐतिहासिक उपलब्धिलाई लिएर रक्सौल विधानसभा क्षेत्रको ऐतिहासिक एवं पौराणिक श्री राम जानकी मन्दिर (वंशीवट गम्हरिया) मा विशेष धार्मिक अनुष्ठान तथा पूजा-अर्चना गरिएको हो।
रक्सौलका भारतीय जनता पार्टी (भाजपा) का विधायक प्रमोद कुमार सिन्हाको प्रमुख उपस्थितिमा मन्दिर परिसरमा विद्वान आचार्यहरूद्वारा वैदिक मन्त्रोच्चारणका साथ बाबा भोलेनाथको विशेष रुद्राभिषेक सम्पन्न गरियो। सो अवसरमा प्रधानमन्त्री मोदीको सुस्वास्थ्य, यशस्वी जीवन र दीर्घायुको कामना गरिएको थियो।
धार्मिक अनुष्ठानपछि बोल्दै रक्सौलका विधायक प्रमोद कुमार सिन्हाले आजको दिन प्रत्येक भारतीय र भाजपा कार्यकर्ताका लागि गौरवको क्षण भएको बताए।
“हाम्रा आदरणीय प्रधानमन्त्री नरेन्द्र मोदीजीले लगातार देशको निस्वार्थ सेवा गरेर नयाँ कीर्तिमान स्थापित गर्नुभएको छ,” विधायक सिन्हाले भने, “यो कीर्तिमान उहाँप्रति देशको जनताले देखाएको अटूट विश्वासको प्रतीक हो। उहाँको सबल नेतृत्वले भारत र सीमावर्ती क्षेत्र रक्सौललाई निरन्तर प्रगतिको पथमा अगाडि बढाउनेछ।”
कार्यक्रममा भाजपाका जिल्ला महासचिव अजय पटेलले प्रधानमन्त्री मोदीको ऐतिहासिक कार्यकाल देशको पुनर्निर्माण र गरिब कल्याणमा समर्पित रहेको चर्चा गरे। उनले मन्दिरमा गरिएको रुद्राभिषेक मोदीप्रतिको अगाध प्रेमको प्रतीक भएको र यसले कार्यकर्ताहरूमा नयाँ ऊर्जा थपेको उल्लेख गरे।
उक्त धार्मिक उत्सवमा क्षेत्रका सयौँ नेता तथा कार्यकर्ताहरूको उत्साहजनक सहभागिता थियो। कार्यक्रममा भाजपा मण्डल अध्यक्ष रिंकु पाण्डे, मण्डल महासचिव सुमन सिंह, वरिष्ठ नेता हरेराम शाह, भोला शाह, चिरञ्जीवी शाहका साथै ठूलो संख्यामा स्थानीय श्रद्धालुहरूको उपस्थिति रहेको थियो।
