काठमाडौँ ।

माध्यमिक शिक्षा परीक्षा (SEE) को पुनर्योग (Retotaling) का लागि आवेदन दिएकामध्ये करिब एक हजार विद्यार्थीको उत्तरपुस्तिका (Answer Sheet) फेला पर्न सकेको छैन। राष्ट्रिय परीक्षा बोर्ड र सम्बन्धित परीक्षा केन्द्रहरूको लापरबाहीका कारण उत्तरपुस्तिका फेला नपर्दा पुनर्योगको नतिजा प्रकाशन प्रक्रिया नराम्ररी प्रभावित भएको छ।

यस वर्ष पुनर्योगका लागि कुल ३३ हजार ८ सय ८७ जना विद्यार्थीले आवेदन दिएका थिए। तीमध्ये ३१ हजार ८ सय ५५ जनाको नतिजा प्रकाशन भइसके पनि उत्तरपुस्तिका नै नभेटिएका कारण करिब १ हजार विद्यार्थीको नतिजा सार्वजनिक गर्न नसकिएको परीक्षा नियन्त्रक टुकराज अधिकारीले जानकारी दिए।

उत्तरपुस्तिका खोज्दै विद्यार्थी सानोठिमीमा, कतिपय पूरक परीक्षा दिन बाध्य

नियमअनुसार ग्रेडवृद्धि (पूरक) परीक्षा सुरु हुनुअगावै पुनर्योगको नतिजा सार्वजनिक गरिसक्नुपर्छ, ताकि नतिजा सच्याएर चित्त बुझेका विद्यार्थीले पूरक परीक्षा दिनु नपरोस्। तर, सोमबारदेखि देशभर पूरक परीक्षा सुरु भइसक्दा पनि पुनर्योगको नतिजा नआएपछि विद्यार्थीहरू मर्कामा परेका छन्। नतिजा नआएकै कारण मोरङ लगायतका जिल्लाका कतिपय विद्यार्थी बाध्य भएर पुनः ग्रेडवृद्धि परीक्षामा सहभागी भइरहेका छन्।

यता, तोकिएको समयमा नतिजा नआएपछि सर्लाही जिल्लाका कतिपय विद्यार्थी पुनर्योगको नतिजा खोज्दै भक्तपुरको सानोठिमीस्थित परीक्षा नियन्त्रण कार्यालय नै आइपुगेका छन्। “कापी खोज्दै छौँ, भेटिएपछि नतिजा आउँछ भनेका छन्। बोर्डको लापरबाहीले गर्दा हामीले दुःख पायौँ,” सानोठिमी आइपुगेका छात्र रवि शाक्यले गुनासो गरे।

हतारमा नतिजा प्रकाशन गर्दा विद्यालयमै छुट्यो उत्तरपुस्तिका

यस पटक परीक्षा सकिएको एक महिनाभित्रै नतिजा सार्वजनिक गर्ने घोषणा गरेको थियो। सोही दबाबका कारण परीक्षा केन्द्रमै उत्तरपुस्तिका परीक्षण गरेर कार्यालयमा पठाउने व्यवस्था मिलाइएको थियो। तर, परीक्षा केन्द्रहरूबाट जथाभाबी र लापरबाहीपूर्ण तरिकाले उत्तरपुस्तिका पोको पारेर पठाएका कारण अहिले खोज्न सास्ती भइरहेको बोर्डका कर्मचारीहरू बताउँछन्।

“उत्तरपुस्तिका खोज्दै जाँदा झापा, इलाम, मोरङ, सुनसरी र सर्लाही लगायतका जिल्लाका उत्तरपुस्तिकाहरू विद्यालयमै छुटेको भेटियो,” परीक्षा नियन्त्रक अधिकारीले भने, “ती उत्तरपुस्तिकाहरू मगाएका छौँ, आएपछि हेरेर नतिजा प्रकाशित गर्छौँ।” विद्यार्थीले परीक्षा केन्द्र र विषय परिवर्तन गरेका कारण पनि केही उत्तरपुस्तिका फेला नपरेको बोर्डको अनुमान छ। हाल दैनिक ३/४ जना कर्मचारी लगाएर उत्तरपुस्तिका खोज्ने काम भइरहेको छ।

साढे ५ प्रतिशतको नतिजा परिवर्तन: शिक्षक र बोर्डको गम्भीर त्रुटि

उत्तरपुस्तिका नभेटिएकै कारण सोमबार जम्मा ३ सय ३९ जनाको मात्रै पुनर्योगको नतिजा प्रकाशित गरिएको थियो, जसमा १८ जनाको नतिजा परिवर्तन (नम्बर थप) भएको छ। त्यसअघि ६ पटकमा ३१ हजार ५ सय १६ जनाको नतिजा निकाल्दा १ हजार ८ सय १० जनाको नतिजा परिवर्तन भएको थियो।

समग्रमा यस वर्ष पुनर्योग गराउँदा साढे ५ प्रतिशतभन्दा बढी विद्यार्थीको नतिजा परिवर्तन भएको छ। उत्तरपुस्तिका परीक्षण गर्दा शिक्षकले प्राप्तांक जोड्न छुटाएको र कम्प्युटरमा प्राप्तांक प्रविष्टि (Entry) गर्दा त्रुटि गरेर विद्यार्थीलाई कम अंक दिएको भेटिएको छ। प्रतिविषय ५ सय रुपैयाँ शुल्क बुझाएर पुनर्योगका लागि आवेदन दिएका विद्यार्थीहरू शिक्षक र बोर्डका कर्मचारीको यस्तो गम्भीर त्रुटिका कारण मानसिक र आर्थिक मारमा परेका छन्।

गत वैशाख २९ गते सार्वजनिक भएको एसईईको नियमिततर्फको नतिजामा सहभागी ४ लाख ३० हजार ६ सय ६७ परीक्षार्थीमध्ये ६१.८१ प्रतिशत अर्थात् २ लाख ८४ हजार विद्यार्थी उत्तीर्ण भएका थिए भने १ लाख ४६ हजार ५ सय ७ जना अनुत्तीर्ण भएका थिए।