वीरगन्ज-
भारतबाट अवैध रूपमा नेपाल प्रवेश गर्न खोज्ने दुई जना उज्वेकिस्तानी महिला नागरिकलाई भारतीय सीमा सुरक्षा बल (एसएसबी) को टोलीले पक्राउ गरेको छ ।
हरैया थाना अन्तर्गत पर्ने कस्टम चोकस्थित मैत्री पुल नजिकैबाट भारतबाट नेपालतर्फ पैदल आउँदै गरेको अवस्थामा उनीहरूलाई नियन्त्रणमा लिइएको हो । पक्राउ पर्नेहरूमा उज्वेकिस्तानको फरगना जिल्ला निवासी ३२ वर्षीया मखफुजा देखकोनोभा र समरकन्द राज्य निवासी ३५ वर्षीया मफतुना किलिचेभा रहेका छन् ।
लामो समयदेखि अवैध रूपमा भारतमा बस्दै आएका उनीहरू बिनाकुनै वैध कागजात नेपाल छिर्न लागेका थिए । सीमामा तैनाथ एसएसबीको टोलीले शङ्का लागेर जाँच गर्दा उनीहरूको अवैध बसाइ र नेपाल पस्ने योजना खुलेको हो ।
एसएसबीले आवश्यक कानुनी कारबाहीका लागि दुवै उज्वेकिस्तानी महिलालाई स्थानीय हरैया थाना (प्रहरी कार्यालय) मा बुझाएको छ । प्रहरीले उनीहरूमाथि आवश्यक सोधपुछ र अनुसन्धान गर्दै थप कानुनी प्रक्रिया अगाडि बढाएको जनाएको छ ।
