वीरगन्ज–

नेशनल मेडिकल कलेज प्रा.लि., वीरगञ्ज र कृषि अनुसन्धान निर्देशनालय, मधेश प्रदेश, परवानीपुरबीच स्वास्थ्य सेवा सहकार्य सम्बन्धी सम्झौता सम्पन्न भएको छ। निर्देशनालयमा कार्यरत कर्मचारी तथा कामदारहरूलाई गुणस्तरीय, सहज र प्राथमिकताका आधारमा स्वास्थ्य सेवा उपलब्ध गराउने उद्देश्यले यो सम्झौता गरिएको हो।

सम्झौतापत्रमा नेशनल मेडिकल कलेजका प्रबन्ध निर्देशक शाहनवाज अन्सारी तथा कृषि अनुसन्धान निर्देशनालय, मधेश प्रदेशका निर्देशक एवं वरिष्ठ वैज्ञानिक डा. विश्वेश्वर प्रसाद यादवले हस्ताक्षर गर्नुभएको छ।

सम्झौता अनुसार सामाजिक सुरक्षा कोषमा आबद्ध निर्देशनालयका कर्मचारी तथा कामदारहरूले नेशनल मेडिकल कलेजमा उपचार गराउँदा कोष अन्तर्गत उपलब्ध सम्पूर्ण स्वास्थ्य सेवाहरू प्राथमिकताका साथ पाउनेछन्। उनीहरूको सहजताका लागि अस्पतालमा छुट्टै ‘सामाजिक सुरक्षा कोष काउन्टर’ (Social Security Fund Counter) मार्फत सेवा उपलब्ध गराइनेछ। साथै, सामाजिक सुरक्षा कोषबाट व्यहोर्न बाँकी रहने सहभुक्तानी (Co-payment) रकम निर्धारित अवधिभित्र भुक्तानी गर्न सकिने व्यवस्था समेत गरिएको छ।

त्यसैगरी, सामाजिक सुरक्षा कोषमा आबद्ध नभएका कृषि अनुसन्धान निर्देशनालयका कर्मचारी तथा उनीहरूका परिवारजनले नेशनल मेडिकल कलेजमा उपचार गराउँदा प्रयोग्य सामग्री (Consumables) बाहेकका उपचार सेवामा २० प्रतिशत विशेष छुट प्राप्त गर्नेछन्। साथै, अस्पतालकै फार्मेसीबाट खरिद गरिने औषधिमा ५ प्रतिशत छुटको व्यवस्था गरिएको छ।

सहकार्य अन्तर्गत वार्षिक स्वास्थ्य परीक्षण, पूर्व-रोजगारी स्वास्थ्य परीक्षण, आवश्यकता अनुसार संस्थामै स्वास्थ्य सेवा तथा प्रत्येक त्रैमासिक (तीन-तीन महिना) मा निःशुल्क स्वास्थ्य शिविर सञ्चालन गर्ने विषयमा समेत सहमति भएको छ। यसैगरी, कृषि अनुसन्धान निर्देशनालयले आयोजना गर्ने विभिन्न कार्यक्रमहरूमा नेशनल मेडिकल कलेजलाई मेडिकल पार्टनरका रूपमा समावेश गरिनेछ भने दुवै संस्थाबीच आवश्यकता अनुसार संयुक्त कार्यक्रमहरू सञ्चालन गरिनेछ।

यस सम्झौताले कृषि अनुसन्धान निर्देशनालयका कर्मचारी, कामदार तथा उनीहरूका परिवारजनको स्वास्थ्य सेवामा पहुँच विस्तार हुनुका साथै गुणस्तरीय उपचार पाउन थप सहज हुने विश्वास लिइएको छ।

सम्झौता कार्यक्रममा नेशनल मेडिकल कलेजका प्रमुख सूचना अधिकृत ई. प्रदीपकुमार चौधरी लगायत दुवै संस्थाका अन्य पदाधिकारीहरूको उपस्थिति रहेको थियो।