काठमाडौं –
अमेरिकाले इरानमाथि लगातार हवाई आक्रमण गरिरहेका बेला इरानले पनि अमेरिकी सैन्य तथा कूटनीतिक संरचनामाथि प्रतिकार तीव्र बनाएको छ। इरानी आक्रमणमा परी जोर्डनमा दुई अमेरिकी सैनिकको मृत्यु भएपछि अमेरिकाले इरानविरुद्ध सैन्य कारबाहीको नयाँ चरण सुरु गरेको छ।
अमेरिकी सेनाका अनुसार शुक्रबार भएको ड्रोन तथा मिसाइल आक्रमणमा दुई अमेरिकी सैनिक मारिएका छन् भने एकजना अझै बेपत्ता छन्। थप चारजना सैनिक घाइते भएका छन्।
युद्ध सुरु भएयता पहिलोपटक इरानी आक्रमणमा आफ्ना सैनिक मारिएको अमेरिकाले औपचारिक रूपमा पुष्टि गरेको हो। अमेरिकी सेनाका अनुसार फेब्रुअरी २८ देखि सुरु भएको युद्धमा हालसम्म १६ अमेरिकी सैनिकको मृत्यु भइसकेको छ भने ४३० भन्दा बढी घाइते भएका छन्।
अमेरिकी सेन्ट्रल कमान्डका अनुसार जोर्डनमा आफ्ना सैनिक मारिएपछि राष्ट्रपति डोनाल्ड ट्रम्पको स्वीकृतिमा इरानका विभिन्न सैन्य लक्ष्यमा नयाँ हवाई आक्रमण सुरु गरिएको हो। अमेरिकी सेनाले लगातार आठौँ रात इरानका सैन्य संरचनामाथि हवाई आक्रमण गरेको जनाएको छ।
राष्ट्रपति ट्रम्पले अमेरिकी सैनिकको मृत्यु दुःखद भएको बताउँदै इरानलाई कुनै पनि हालतमा आणविक हतियार विकास गर्न नदिइने बताएका छन्।
अमेरिकी सेनाले नयाँ आक्रमणको मुख्य उद्देश्य होर्मुज जलमार्गमा व्यावसायिक जहाजको आवागमनमा इरानले सिर्जना गरेको खतरा कम गर्नु रहेको जनाएको छ। शनिबार अमेरिकी सेनाले इरानको इस्लामिक रिभोलुसनरी गार्ड्सविरुद्ध पनि नयाँ हवाई आक्रमण गरेको बताएको छ।
अमेरिकाका अनुसार यी आक्रमणको उद्देश्य होर्मुज जलमार्ग हुँदै तेल ट्यांकरको आवागमन अवरुद्ध गर्ने इरानको क्षमतालाई कमजोर बनाउनु हो।
यसबीच, इरानले पनि अमेरिकी लक्ष्यविरुद्ध आक्रमण तीव्र बनाएको छ। इराकको अर्बिलस्थित अमेरिकी वाणिज्य दूतावासलाई ड्रोनमार्फत निशाना बनाउने प्रयास भएको बताइएको छ। घटनालगत्तै त्यहाँको हवाई सुरक्षा प्रणाली सक्रिय पारिएको थियो।
इरानी आक्रमणका कारण कुवेतस्थित सरकारी तेल कम्पनीअन्तर्गतको एक इकाइमा क्षति पुगेको कुवेती अधिकारीहरूले बताएका छन्। यसअघि विद्युत् तथा समुद्री पानीलाई पिउन योग्य बनाउने प्लान्टमा समेत इरानी आक्रमण भएको आरोप लगाइएको थियो।
इरानका सर्वोच्च नेता मुज्तबा खामेनीईले राष्ट्रपति ट्रम्पका अभिव्यक्तिलाई अस्वीकार गर्दै उनको हस्ताक्षरको कुनै अर्थ नरहेको टिप्पणी गरेका छन्। उनले हालै भएको सम्झौता उल्लंघन गर्ने पक्ष अमेरिका नै भएको आरोप लगाएका छन्।
केही दिनअघि राष्ट्रपति ट्रम्पले इरानका पुल तथा विद्युत् गृहहरू ध्वस्त पार्ने चेतावनी दिएका थिए। यद्यपि, अमेरिकी सेनाले हालसम्म हतियार भण्डारण केन्द्र र सैन्य अड्डाहरूलाई मात्र निशाना बनाइएको दाबी गरेको छ। पुल वा विद्युत् पूर्वाधारमा आक्रमण गरिएको विषयमा भने कुनै आधिकारिक पुष्टि भएको छैन।
अमेरिका र इरानबीचको तनाव लगातार चर्किँदै गएको छ। अमेरिकाले आठ दिनदेखि लगातार इरानमाथि हवाई आक्रमण गरिरहेको छ भने इरानले पनि अमेरिकी सैन्य तथा रणनीतिक संरचनालाई लक्षित गर्दै प्रतिकार बढाएको छ। अमेरिकी सैनिकको मृत्यु हुन थालेपछि यो संघर्ष थप प्रत्यक्ष र जोखिमपूर्ण चरणमा प्रवेश गरेको देखिएको छ।
