वीरगन्ज-
पर्सा प्रहरीले भारी परिमाणको लागुऔषध गाँजासहित एक जनालाई नियन्त्रणमा लिएको छ।
पर्साको बिन्दवासिनी गाउँपालिका वडा नं. ५ स्थित सडकखण्ड हुँदै लागुऔषध लुकाएर भिन्दवातर्फ लैजाँदै गरेको भन्ने विशेष सूचनाका आधारमा प्रहरीले मंगलबार साँझ करिब ६:३० बजे जाँच गर्दा उक्त गाँजा बरामद गरेको हो।
इलाका प्रहरी कार्यालय पोखरिया र प्रहरी चौकी प्रसौनीभठ्ठाको संयुक्त प्रहरी टोलीले प्रदेश ३–०१–०२४ च ५३८५ नम्बरको टाटा योद्धा पिकअप गाडीलाई रोकेर जाँच गरेको थियो। जाँचका क्रममा गाडीभित्र सिमेन्टको बोराभित्र लुकाएर राखिएको अवस्थामा २०७ किलोग्राम गाँजा फेला परेको जिल्ला प्रहरी कार्यालय पर्साले जनाएको छ।
गाँजा बरामद भएपछि प्रहरीले मकवानपुर जिल्लाको हेटौँडा उपमहानगरपालिका वडा नं. १३ निवासी ४८ वर्षीय चालक कृष्णा लामालाई नियन्त्रणमा लिएको छ।
जिल्ला प्रहरी कार्यालय पर्साका प्रवक्ता तथा प्रहरी नायब उपरीक्षक (डीएसपी) चक्र बहादुर मल्लका अनुसार पक्राउ परेका लामा, बरामद २०७ किलो गाँजा र प्रयोग गरिएको पिकअप गाडीलाई नियन्त्रणमा लिएर थप अनुसन्धान कार्य अगाडि बढाइएको छ।
