जयपुर –
श्रीमान्को दीर्घायु र सुस्वास्थ्यको कामना गर्दै करवा चौथको व्रत बसेकी एक महिलाको आफ्नै श्रीमान्ले हत्या गरेका छन्। भारतको राजस्थानस्थित जयपुरमा व्रतको तयारीमा रहेकी ३८ वर्षीया लक्ष्मी रेगरको उनका ४२ वर्षीय श्रीमान् प्रदीप कुमारले फलामको रडले टाउकोमा प्रहार गरी हत्या गरेको खुलेको छ।
जयपुरको प्रताप नगर क्षेत्रमा बुधबार भएको उक्त घटनाले स्थानीय क्षेत्रमा सनसनी फैलाएको छ। घरायसी विवादका क्रममा प्रदीपले लक्ष्मीको टाउकोमा फलामको रडले प्रहार गरेको प्रहरीको प्रारम्भिक अनुसन्धानबाट खुलेको छ।
स्थानीय बासिन्दाका अनुसार हत्या भएको दिन लक्ष्मी करवा चौथको व्रत तथा पूजाका लागि आवश्यक सामग्री खरिद गर्दै थिइन्। हिन्दू परम्पराअनुसार विवाहित महिलाले श्रीमान्को दीर्घायु र सुखी वैवाहिक जीवनको कामना गर्दै करवा चौथको व्रत बस्ने गर्छन्। तर, श्रीमान्को दीर्घायुको कामनामा व्रतको तयारी गरिरहेकै दिन उनी आफ्नै श्रीमान्को हातबाट मारिन पुगिन्।
हत्या गरेपछि प्रदीपले श्रीमतीको शव घरभित्रै छाडेर आफ्ना तीन सन्तानसँगै दुई दिन बिताएको प्रहरीले जनाएको छ। ती बालबालिकामध्ये सबैभन्दा कान्छो सन्तान साढे दुई महिनाको मात्रै रहेको बताइएको छ। अन्य दुई बालबालिका पनि तीन वर्षसम्मका छन्।
प्रहरीका अनुसार शुक्रबार बिहान प्रदीप आफैँले प्रहरी नियन्त्रण कक्षमा फोन गरेर श्रीमतीको हत्या गरेको जानकारी दिएका थिए। त्यसपछि उनी घरबाट फरार भएका थिए। प्रहरीले मोबाइल फोनको लोकेसनका आधारमा उनलाई नजिकैको गल्लीमा लुकेको अवस्थामा पक्राउ गरेको हो।
सहायक प्रहरी आयुक्त दीपक खण्डेलवालका अनुसार लक्ष्मी र प्रदीप पछिल्लो पाँच वर्षदेखि सँगै बस्दै आएका थिए। दुवैको यसअघि छुट्टाछुट्टै विवाह भइसकेको भए पनि उनीहरूको सम्बन्धको कानुनी अवस्था स्पष्ट हुन बाँकी छ।
सूचना पाएपछि प्रहरी टोली उनीहरू बस्दै आएको बहुमञ्जिले आवासीय भवनको छैटौँ तलास्थित भाडाको कोठामा पुगेको थियो। बाहिरबाट ढोका बन्द गरिएको अवस्थामा प्रहरीले कोठाभित्र प्रवेश गर्दा लक्ष्मीको शव भुइँमा फेला परेको थियो। शवसँगै तीन बालबालिका पनि थिए।
प्रहरीका अनुसार हत्या गरेपछि प्रदीपले घरका ढोका र झ्याल बन्द गरेका थिए। शवबाट दुर्गन्ध बाहिर नफैलियोस् भन्ने उद्देश्यले उनले त्यसो गरेको प्रारम्भिक अनुसन्धानमा खुलेको छ।
प्रहरीले घटनाबारे थप अनुसन्धान गरिरहेको जनाएको छ।स्रोत : द टाइम्स अफ इन्डिया
