काठमाडौँ-
मुम्बई इन्डियन्सले दिल्ली क्यापिटल्सलाई ५९ रनले पराजित गर्दै इन्डियन प्रिमियर लिग (आईपीएल) २०२५ को प्लेअफमा स्थान पक्का गरेको छ। बुधबार वाङ्खडे स्टेडियममा भएको यो निर्णायक खेलमा मुम्बईको जितसँगै आईपीएल २०२५ को प्लेअफ समीकरण पूरा भएको छ। गुजरात टाइटन्स, रोयल च्यालेन्जर्स ब्याङ्गलोर (आरसीबी), पन्जाब किङ्स र मुम्बई इन्डियन्सले अब उपाधिका लागि प्रतिस्पर्धा गर्नेछन्।
टस हारेर पहिले ब्याटिङ गरेको मुम्बईले निर्धारित २० ओभरमा ५ विकेट गुमाउँदै १८० रनको सम्मानजनक स्कोर बनायो। सूर्यकुमार यादवले उत्कृष्ट प्रदर्शन गर्दै ४३ बलमा ७ चौका र ४ छक्कासहित अविजित ७३ रन बनाए। उनको यो पारी मुम्बईको बलियो स्कोरको आधार बन्यो। ओपनर र्यान रिकेल्टोनले २५ रन, विल ज्याक्सले २१ रन, तिलक वर्माले २७ रन र नमान धीरले अविजित २४ रन जोडे। दिल्लीका लागि मुकेश कुमारले २ विकेट लिए भने दुश्मन्था चमेरा, मुस्ताफिजुर रहमान र कुलदीप यादवले समान १-१ विकेट हात पारे।
जवाफी ब्याटिङमा उत्रिएको दिल्ली १८.२ ओभरमा १२१ रनमै अलआउट भयो। दिल्लीका लागि समिर रिज्भिले ३५ बलमा ६ चौका र १ छक्कासहित सर्वाधिक ३९ रन बनाए। ओपनर केएल राहुल ११ रनमा क्याचआउट भए भने अस्थायी कप्तान फाफ डु प्लेसिसले ६ रन मात्र जोड्न सके। विपराज निगमले २० रन र आशुतोष शर्माले १८ रन बनाए पनि अन्य ब्याट्सम्यानले दोहोरो अंकको स्कोर छुन सकेनन्। दिल्लीका नियमित कप्तान अक्षर पटेल फ्लुका कारण यो खेलमा सहभागी हुन सकेनन्, र उनको अनुपस्थितिमा फाफ डु प्लेसिसले टोलीको नेतृत्व गरेका थिए।
मुम्बईका बलरहरूले उत्कृष्ट प्रदर्शन गरे। जसप्रीत बुम्राह र मिचेल स्यान्टनरले समान ३-३ विकेट लिए भने ट्रेन्ट बोल्ट, दीपक चहार, विल ज्याक्स र कर्न शर्माले समान १-१ विकेट हात पारे। सूर्यकुमार यादवलाई उनको शानदार ब्याटिङका लागि ‘प्लेयर अफ द म्याच’ घोषित गरियो।
यो हारसँगै दिल्ली क्यापिटल्सको आईपीएल २०२५ को प्लेअफ सम्भावना समाप्त भएको छ। यसअघि गुजरात टाइटन्स, आरसीबी र पन्जाब किङ्सले प्लेअफमा स्थान बनाइसकेका छन्। मुम्बईले यो जितसँगै लिग चरणको आफ्नो अन्तिम खेल पन्जाब किङ्सविरुद्ध मे २६ मा जयपुरमा खेल्नेछ। दिल्लीले पनि आफ्नो अन्तिम लिग खेल मे २४ मा पन्जाब किङ्सविरुद्ध जयपुरमा खेल्नेछ।
