काठमाडौँ–
पाकिस्तानको गुप्तचर एजेन्सी इन्टर सर्भिस इन्टेलिजेन्स (आईएसआई) का लागि जासुसी गरेको आरोपमा दिल्ली प्रहरीले एक नेपाली नागरिकलाई पक्राउ गरेको छ। भारतीय सञ्चारमाध्यमका अनुसार, सन् २०२५ को जनवरीदेखि मार्चसम्म सञ्चालित गोप्य अपरेशनका क्रममा आईएसआईको स्लिपर सेलविरुद्ध कारबाही गर्दा दुई जना पक्राउ परेका थिए, जसमध्ये एक जना नेपाली मूलका अन्सारुल मियान अन्सारी हुन्।
आउटलुक इन्डियाले जनाएअनुसार, अन्सारी कतारमा ट्याक्सी चालकको रूपमा कार्यरत थिए, जहाँ उनले आईएसआईको ह्याण्डलरसँग सम्पर्क स्थापित गरेका थिए। त्यसपछि उनलाई पाकिस्तान लगिएको र त्यहाँ आईएसआईका उच्च अधिकृतहरूले तालिम प्रदान गरेको भारतीय समाचार एजेन्सी एएनआईले दाबी गरेको छ। “उनी नेपाल हुँदै दिल्ली पठाइएका थिए र पाकिस्तान फर्कन लागेका बेला दिल्लीको एक होटलबाट पक्राउ परे,” एएनआईले उल्लेख गरेको छ।
दिल्ली प्रहरीले अन्सारीको साथबाट भारतीय सेनासँग सम्बन्धित गोप्य कागजातहरू बरामद गरेको र उनलाई आईएसआईको निर्देशनमा ती कागजातहरूको सीडी बनाएर पाकिस्तान पठाउने योजना रहेको बताएको छ। यो अपरेशनमा केन्द्रीय गुप्तचर एजेन्सीहरूको समेत सहभागिता रहेको थियो। अन्सारीको बयानका आधारमा राँचीमा अर्का एक व्यक्तिलाई पनि पक्राउ गरिएको प्रहरी स्रोतले जनाएको छ।
दिल्ली प्रहरीले मे २०२५ मा दुवै आरोपितविरुद्ध अभियोग पत्र दायर गरेको छ, र उनीहरू हाल तिहाड जेलको उच्च सुरक्षा क्षेत्रमा छन्। प्रहरीले उनीहरूले अन्य कैदीहरूलाई प्रभावित नपारुन् भनी विशेष निगरानी राखिएको जनाएको छ।
यसअघि पनि आईएसआईसँग सम्बन्ध भएको आरोपमा विभिन्न स्थानमा नेपाली नागरिकहरू संलग्न रहेको र केही अज्ञात व्यक्तिको गोली प्रहारबाट मारिएको घटनाहरू सार्वजनिक भएका थिए। यो घटनाले नेपाल-भारत सीमामा गुप्तचर गतिविधिको जोखिम र चुनौतीलाई पुनः उजागर गरेको छ।
