वीरगन्ज –

वीरगन्ज महानगरपालिका वडा नम्बर १०, आदर्शनगरस्थित लर्ड्स दियालो होटलको स्वीमिङ पुलमा बुधबार स्वीमिङ प्रशिक्षणका क्रममा एक ९ वर्षीय बालकको डुबेर मृत्यु भएको छ। मृतक बालक वीरगन्ज महानगरपालिका वडा नम्बर ११ का प्रमोद रौनियारका छोरा बजरंगी रौनियार हुन्।

नेपाल स्वीमिङ एसोसिएसन पर्साले आयोजना गरेको १० दिने स्वीमिङ प्रशिक्षण कार्यक्रममा सहभागी बजरंगीको डुबेर अचेत भएपछि नारायणी अस्पताल पु¥याइएको थियो, तर चिकित्सकले उनलाई मृत घोषणा गरे। मृतकका बाबु प्रमोद रौनियारका अनुसार, प्रशिक्षक असेसर पटेल र उनकी छोरीले उक्त प्रशिक्षण कार्यक्रम सञ्चालन गरेका थिए। प्रमोदले आफू कार्यालयको कामले पोखरामा भएको बेला छोरालाई प्रशिक्षक असेसरले नै प्रशिक्षणका लागि लगेका थिए। उनले राति ८ बजे छोराको मृत्युको खबर पाएको बताए।

मृतकका काका विकास रौनियारले प्रशिक्षकको लापरबाहीका कारण भतिजाको मृत्यु भएको आरोप लगाएका छन्। उनले भने, “प्रशिक्षकको उपस्थितिमा बच्चा कसरी डुब्यो? बच्चा डुबिरहँदा प्रशिक्षक कहाँ थिए र के गरिरहेका थिए? दोषीलाई कारबाही हुनुपर्छ।” विकासका अनुसार, होटलका कर्मचारीले बालकलाई दिउँसो ४ बजे नारायणी अस्पतालमा छोडेर भागेका थिए। अस्पतालका चिकित्सकले कुनै जानकारी नदिई कर्मचारीहरू भागेको र आफूहरूलाई साँझ ७ बजे प्रहरीमार्फत मृत्युको खबर प्राप्त भएको उनले बताए।

प्रशिक्षक असेसर पटेलले भने आफ्नी छोरीले बच्चाहरूलाई प्रशिक्षण दिइरहेको र घटना कसरी भएको भन्ने विषयमा आफूलाई पनि जानकारी नभएको दाबी गरेका छन्।

जिल्ला प्रहरी कार्यालय पर्साका प्रहरी नायब उपरीक्षक (डीएसपी) किशोर लम्सालले बजरंगी स्वीमिङ पुलमा नुहाउने क्रममा डुबेर अचेत भएको र अस्पताल पु¥याउँदा मृत्यु भएको पुष्टि भएको बताए। घटनालाई शङ्कास्पद मानेर प्रहरीले थप अनुसन्धान सुरु गरेको छ। बालकको शव पोस्टमार्टमका लागि नारायणी अस्पतालमा राखिएको छ।

यो घटनाले स्वीमिङ प्रशिक्षणको सुरक्षा मापदण्ड र प्रशिक्षकको जिम्मेवारीमाथि गम्भीर प्रश्न उठाएको छ।