काठमाडौं-
जल तथा मौसम पूर्वानुमान महाशाखाका अनुसार हाल देशभर मनसुनी वायुको प्रभाव कायम छ। मनसुनको न्यून चापीय रेखा पूर्वमा सरदर स्थानको आसपास र पश्चिममा सरदरभन्दा केही उत्तरतिर रहेको छ।
आज दिउँसो देशभर आंशिकदेखि साधारणतया बदली रहने र कोशी, वाग्मती, लुम्बिनी र सुदूरपश्चिम प्रदेशलगायत अन्य प्रदेशका केही स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ। कोशी, वाग्मती, लुम्बिनी र सुदूरपश्चिमका एक-दुई स्थानमा भारी वर्षाको सम्भावना रहेको छ। उच्च पहाडी तथा हिमाली क्षेत्रमा हल्कादेखि मध्यम वर्षा र हिमपातको सम्भावना पनि छ।
रातिको समयमा पनि देशभर आंशिकदेखि साधारणतया बदली रहने र सातै प्रदेशका पहाडी भागका केही स्थानमा मेघगर्जन र चट्याङसहित हल्कादेखि मध्यम वर्षा हुने महाशाखाले जनाएको छ।
मनसुनी वर्षाका कारण बाढी, पहिरो, गेग्रान बहाव र सहरी तथा तराई क्षेत्रमा डुबानको जोखिम रहेको भन्दै महाशाखाले सतर्कता अपनाउन आग्रह गरेको छ। ठूला तथा साना नदी-खोलामा पानीको सतह बढ्ने, दैनिक जनजीवन, कृषि, स्वास्थ्य, पर्यटन, सडक र हवाई यातायात प्रभावित हुन सक्ने भएकाले सर्वसाधारण र सम्बन्धित निकायलाई पूर्वतयारी गर्न अनुरोध गरिएको छ।
