पर्सा-
पर्सा जिल्लाको पकाहाँमैनपुर गाउँपालिकामा पूर्व अध्यक्ष विजय चौरसियाको पहलमा सुरु गरिएको नहर सफाइ अभियानले स्थानीय किसानलाई सिँचाइमा ठूलो राहत पुर्याउने विश्वास गरिएको छ।
नरायणी सिँचाइ आयोजनाको प्राविधिक सहयोगमा सञ्चालित यस अभियानमार्फत लामो समयदेखि अबरुद्ध रहँदै आएको प्रमुख नहर सफा गरिएको हो। यस नहरमार्फत गाउँपालिका–१, २, ३ र ४ का हजारौं रोपनी जमीनमा सिँचाइ सुविधा पुर्याउने लक्ष्य लिइएको छ।
पूर्व अध्यक्ष चौरसियाले भन्नुभयो, “सिँचाइको अभावमा किसानले वर्षौंदेखि पीडा भोग्दै आएका थिए। नहर सफाइपछि अहिलेका खेतीपातीका लागि पानीको सहज आपूर्ति हुनेछ।”
उत्पादनमा सुधारको आशा
स्थानीय किसानहरूले पनि अभियानको स्वागत गरेका छन्। उनीहरूका अनुसार अघिल्लो वर्ष समयमा पानी नपाएर धान, मकै लगायतका अन्नबाली उत्पादनमा उल्लेखनीय गिरावट आएको थियो। नहर सफाइसँगै उत्पादनमा सुधार आउने अपेक्षा गरिएको छ।
स्थानीय नेतृत्वको सकारात्मक पहल
यो पहलले स्थानीय तहमा जनप्रतिनिधिहरूको सक्रियता र सहकार्यद्वारा समुदायमा प्रत्यक्ष लाभ पुग्ने उदाहरण पेश गरेको छ। पूर्व अध्यक्ष चौरसियाको अग्रसरता र सिँचाइ आयोजनाको सहकार्यबाट सम्भव भएको यो अभियानले अन्य पालिकालाई पनि प्रेरणा दिनसक्ने स्थानीयवासीहरूले बताएका छन्।
