वीरगन्ज-
पर्सा प्रहरीले स्रोत नखुलेको रकमसहित भारतीय नागरिकलाई पक्राउ गरेको छ।
पक्राउ पर्नेमा भारत बिहार जिल्ला मोतिहारी थाना रक्सौल वडा नम्बर १ का ५३ वर्षीय सुरेन्द्र साह रहेका छन्। साहलाई शुक्रबार बिहान ९ बजे वीरगन्ज महानगरपालिका-१६ रजतजयन्ती चोक सडकबाट पक्राउ गरिएको पर्सा प्रहरी प्रमुख प्रहरी उपरीक्षक सुदीपराज पाठकले बताए।
उनका अनुसार साह मधेस प्रदेश०३-०२५ प ९८०७ नम्बरको मोटरसाइकलमा सवार थिए। उनको साथबाट १ हजार दरका ७०० थान, पाँच सय दरका ६०० थान गरी जम्मा १० लाख रुपैयाँ बरामद भएको पाठकले बताए। पक्राउ परेका साहमाथि अनुसन्धान थालिएको छ।
स्रोत नखुलेको रकम हुण्डी कारोबारमा प्रयोग हुने गरेको छ। हुण्डी कारोबार गैरकानुनी रहेकाले राष्ट्र बैंक अन्तर्गतको कसुर आकर्षित हुने गरेको छ।
