बेइजिङ –

चीनको सेवा क्षेत्रको गतिविधि डिसेम्बर महिनामा पछिल्ला छ महिनामध्ये सबैभन्दा सुस्त गतिमा विस्तार भएको छ। नयाँ व्यवसायको वृद्धिदर घट्नु र विदेशी माग कमजोर हुनु यसको प्रमुख कारण रहेको निजी क्षेत्रको एक सर्वेक्षणले सोमबार देखाएको छ।

एस एन्ड पी ग्लोबल (S&P Global) ले संकलन गरेको रेटिङडग चाइना जनरल सर्भिसेस पीएमआई (PMI) सूचक डिसेम्बरमा ५२.० मा झरेको छ, जुन अघिल्लो महिनाको ५२.१ भन्दा थोरै कम हो। यो सूचक जुन महिनापछि कै सबैभन्दा कमजोर हो। पीएमआईमा ५० अंकभन्दा माथि रहनु विस्तार र तल झर्नु सङ्कुचनको सूचक मानिन्छ।

सर्वेक्षणअनुसार नयाँ व्यवसाय ६ महिनामै सबैभन्दा कम गतिमा बढेको छ। अघिल्लो महिना विस्तार भएको नयाँ निर्यात व्यवसाय डिसेम्बरमा भने सङ्कुचनमा गएको छ, जसको मुख्य कारण पर्यटकको संख्या घट्नु रहेको बताइएको छ।

यद्यपि, व्यावसायिक मनोबलमा सुधार देखिएको छ। अपेक्षा सूचक (expectations sub-index) ९ महिनाकै उच्च स्तरमा पुगेको छ, जसलाई बजार अवस्था सुधार हुने पूर्वानुमान र सन् २०२६ का लागि विस्तार योजनाले समर्थन गरेको छ।

रेटिङडगका संस्थापक याओ यू ले भने,“सेवा क्षेत्रले सन् २०२५ को अन्त्य ‘सामान्य वृद्धि तर उच्च अपेक्षा’ को अवस्थासहित गरेको छ।”
उनका अनुसार रोजगारी घट्नु र बाह्य मागमा देखिएको अस्थिरता अझै पनि प्रमुख अवरोधका रूपमा रहेका छन्।

दीर्घकालीन सम्पत्ति बजारको मन्दी र अपस्फीतिको दबाबजस्ता संरचनागत चुनौतीबीच चीनको अर्थतन्त्रले पुनः गति लिन संघर्ष गरिरहेको छ। यद्यपि, चालु वर्ष करिब ५ प्रतिशत आर्थिक वृद्धिको लक्ष्य हासिल गर्ने दिशामा भने चीन अघि बढिरहेको छ।

लगातार देखिँदै आएको अपस्फीतिको दबाब कम गर्न सरकारले उत्पादन क्षमताको अत्यधिक वृद्धि र कम्पनीहरूबीचको मूल्य युद्ध नियन्त्रण गर्ने प्रयास तीव्र बनाएको छ।

गत महिना चिनियाँ कम्युनिस्ट पार्टीको एक महत्वपूर्ण बैठकमा नेताहरूले आगामी वर्ष “सक्रिय” राजकोषीय नीति अपनाउने प्रतिबद्धता जनाएका थिए, जसले उपभोग र लगानी दुवैलाई प्रोत्साहन गरी उच्च आर्थिक वृद्धि कायम राख्ने लक्ष्य राखेको छ।

सर्वेक्षणले देखाएअनुसार कम्पनीहरूले लगातार पाँचौँ महिनासम्म कर्मचारी संख्या घटाएका छन्। यस क्रममा स्थायी र अस्थायी दुवै प्रकारका कामदार हटाइएका छन्, जसका कारण कामको थोरै चाप (backlog) बढेको छ।

कच्चा पदार्थ र श्रम लागत बढेकाले उत्पादन लागत लगातार दशौँ महिनासम्म बढेको छ। तर, तीव्र प्रतिस्पर्धाका कारण मूल्य निर्धारण क्षमतामा दबाब परेपछि कम्पनीहरूले बिक्री मूल्य घटाएका छन्।

उत्पादन र सेवा क्षेत्रको संयुक्त अवस्थालाई देखाउने कम्पोजिट आउटपुट सूचक ५१.३ मा पुगेको छ, जुन नोभेम्बरको ५१.२ भन्दा थोरै बढी हो।स्रोत: रायटर्स