रौतहट-
जिल्ला प्रहरी कार्यालय रौतहटले नक्कली प्रहरी बनेर किसानसँग पैसा मागिरहेका एक जनालाई पक्राउ गरेको छ। घटनामा गरुडा नगरपालिका–८ बिर्ता गाउँका ४४ वर्षीय सदरे आलम संलग्न रहेको जिल्ला प्रहरी प्रवक्ता डिएसपी दीपक कुमार रायले जानकारी दिए।
शुक्रवार दिउँसो गौर चन्द्रिगाहपुर सडकखण्ड अन्तर्गत बिर्ता चौकमा आलमले आफूलाई जिल्लाको घुमुवा प्रहरी बताएर किसानले ल्याउँदै गरेको मलखाद रोकेर पैसा मागिरहेको थियो। यसको सूचना पाएपछि प्रहरी चौकी बिर्ताबाट गएको टोलीले उनलाई पक्राउ गरेको हो।
आरोपी आलम हाल इलाका प्रहरी कार्यालय गरुडाको हिरासतमा रहेको छ। उनको विरुद्ध थप अनुसन्धान भइरहेको जिल्ला प्रहरी कार्यालय रौतहटले जनाएको छ।
यस घटनाले नक्कली प्रहरी बनेर नागरिकलाई ठग्ने प्रयास गर्ने घटनाको संकेत दिएको छ। प्रहरीले यस्ता घटनाहरू रोक्न र नागरिकलाई सचेत बनाउन अझै सक्रिय भूमिका खेल्ने बताएको छ। साथै, नागरिकहरूलाई पनि यस्ता संदिग्ध व्यक्तिहरूको बारेमा तुरुन्त प्रहरीलाई जानकारी दिन आग्रह गरिएको छ।
