वीरगन्ज –
वीरगन्जको प्रसिद्ध शक्तिपीठ गहवामाई मन्दिरबाट चैते दसैँको पावन अष्टमीको अवसरमा आज शनिवार आयोजित गहवामाई माताको दोस्रो डोली यात्रा भव्य र उल्लासमय वातावरणमा सम्पन्न भएको छ।
गहवामाई मन्दिर व्यवस्थापन समितिको संयोजन र सक्रियतामा भएको यो धार्मिक यात्रामा स्थानीयसहित बाहिरी क्षेत्रबाट आएका हजारौँ श्रद्धालु भक्तजनले उत्साहपूर्वक सहभागिता जनाएका थिए।
मन्दिर व्यवस्थापन समितिका अध्यक्ष नरेन्द्र साहले बताएअनुसार डोली यात्राको तयारी लामो समयदेखि चलिरहेको थियो। उनले भने, “आजको दिनलाई विशेष र अविस्मरणीय बनाउन हामीले कुनै कसर बाँकी राखेका छैनौँ।” यात्राको क्रममा भक्तजनहरूले माताको जयकारा लगाउँदै भक्ति भावमा डुबेको दृश्यले वातावरणलाई अझै रमणीय बनाएको थियो।
यो डोली यात्रा वीरगन्जको धार्मिक र सांस्कृतिक महत्त्वको एक प्रमुख पर्वको रूपमा स्थापित छ, जसले हरेक वर्ष ठूलो संख्यामा श्रद्धालुहरूलाई एकत्रित गर्ने गर्छ।
