(एजेन्सी) –
बङ्गलादेशको मयमनसिंहमा भीडद्वारा कुटपिट गरी हत्या गरिएका हिन्दू युवक दीपू चन्द्र दासको परिवारको दयनीय अवस्थालाई लिएर सामाजिक सञ्जालमा विश्वव्यापी ऐक्यबद्धता देखिएको छ। दीपूको मृत्युपछि सहाराविहीन बनेको उनको परिवारका लागि भारत, अमेरिका, सिंगापुर लगायतका देशहरूबाट आर्थिक सहयोग जुट्ने क्रम तीव्र भएको छ।
दीपू चन्द्र दास आफ्नो परिवारका एक मात्र कमाउने सदस्य थिए। उनी एक गार्मेन्ट फ्याक्ट्रीमा सामान्य तलबमा काम गर्थे। राम्रो कार्यसम्पादनका कारण कम्पनीले उनलाई बढुवा (प्रमोशन) दिएको थियो। तर, यही कुरामा असन्तुष्ट रहेका केही सहकर्मीहरूले उनलाई सामाजिक सञ्जालमा ‘भड्काउ सन्देश’ फैलाएको झुठो आरोप लगाएका थिए। पीडित पक्षका अनुसार दीपुसँग एउटा स्मार्टफोनसम्म थिएन, तैपनि उनलाई प्रविधिको दुरुपयोग गरेको आरोपमा भीडले निशाना बनाएको थियो।
चटगाउँ विश्वविद्यालयका संस्कृत विभागका प्रोफेसर कुशल बरन चक्रवर्तीले पीडित परिवारलाई भेटेपछि उनीहरूको अवस्था अत्यन्तै हृदयविदारक रहेको बताएका छन्। “परिवार भावनात्मक रूपमा मात्र होइन, आर्थिक रूपमा पनि पूर्णतः ध्वस्त भएको छ। उनीहरूसँग एक हप्ताको लागि खाने रासन समेत छैन,” चक्रवर्तीले भने।
दीपूको विवाह दुई वर्षअघि मात्र भएको थियो र उनको एउटा सानो बच्चा छ। मयमनसिंहको तारकान्दी थाना क्षेत्रमा रहेको एउटा गोदामको पछाडि अस्थायी टहरोमा बस्दै आएको यो परिवारलाई दीपूको शव घर ल्याउन समेत अवरोध पुर्याइएको बताइएको छ।
परिवारको यो दुर्दशा सार्वजनिक भएपछि सामाजिक सञ्जालमा सहयोगको ठूलो लहर चलेको छ। प्रोफेसर चक्रवर्तीले फेसबुकमार्फत परिवारको बैंक खाता विवरण सार्वजनिक गरेपछि सोमवार साँझसम्ममा लाखौं रुपैयाँ सहयोग संकलन भएको छ। संसारभरका मानिसहरूले सहयोग गरेको स्क्रीनशटहरू साझा गर्दै ऐक्यबद्धता जनाइरहेका छन्।
यस घटनाले बङ्गलादेशमा अल्पसंख्यक समुदायको सुरक्षा र न्याय व्यवस्थामाथि पुनः गम्भीर प्रश्न उठाएको छ। दीपूको हत्याको सर्वत्र निन्दा भइरहेको छ भने दोषीमाथि कडा कारबाहीको माग अझै सशक्त बन्दै गएको छ। यद्यपि, विश्वभरबाट प्राप्त आर्थिक सहयोगले पीडित परिवारका लागि केही राहतको किरण भने देखाएको छ।
