वीरगन्ज-
वीरगन्ज महानगर क्षेत्रका माछा तथा मासु पसलहरूमा उपभोक्ता ठगिने क्रम बढेपछि जिल्ला प्रशासन कार्यालय पर्साले कडा कदम चाल्ने निर्णय गरेको छ । पछिल्लो समय खसीको मासु भनेर बाख्राको मासु बिक्री गर्ने, सरसफाइमा लापरबाही गर्ने र कम तौल दिएर उपभोक्ता ठग्ने गुनासो बढेपछि प्रशासनले सरोकारवालाहरूसँग छलफल गरी यस्तो निर्णय गरेको हो ।
जिल्ला प्रशासन कार्यालय पर्साको सभाहलमा आयोजित कार्यक्रममा नियमनकारी निकाय, उपभोक्ता हित संरक्षण मञ्च नेपाल र माछा–मासु व्यवसायीहरूको सहभागिता रहेको थियो । उपभोक्ता हित संरक्षण मञ्चले बजारमा देखिएका विकृतिबारे प्रमुख जिल्ला अधिकारी भोला दाहाललाई जानकारी गराएपछि यस विषयमा गम्भीर छलफल भएको हो ।
छलफलका क्रममा प्रमुख जिल्ला अधिकारी दाहालले उपभोक्ताको स्वास्थ्य र अधिकारमाथि खेलवाड गर्ने कुनै पनि गतिविधि सह्य नहुने स्पष्ट पार्नुभयो । उहाँले व्यवसायलाई पारदर्शी र उपभोक्तामैत्री बनाउन सबै पक्ष जिम्मेवार हुनुपर्नेमा जोड दिनुभयो ।
अनुगमन र कडाइका मुख्य निर्णयहरू छलफलले बजारलाई व्यवस्थित बनाउन निम्न महत्वपूर्ण निर्णयहरू गरेको छ :
- मूल्यसूची अनिवार्य: मासु व्यवसायीहरूले आफ्नो पसलमा अनिवार्य रूपमा मूल्यसूची राख्नुपर्नेछ ।
- स्पष्ट पहिचान: खसी, बाख्रा, कुखुरा लगायतका मासुको स्पष्ट पहिचान खुलाएर मात्र बिक्री वितरण गर्नुपर्ने ।
- कारबाहीको चेतावनी: उपभोक्तालाई कम तौल दिने र ठगी गर्ने व्यवसायीमाथि कडा कानुनी कारबाही गरिने ।
- नियमित अनुगमन: जिल्ला प्रशासन कार्यालयले अनुगमन टोलीलाई सक्रिय बनाई नियमित रूपमा बजार निरीक्षण गर्ने ।
- सरसफाइमा निर्देशन: पसल र वधस्थलमा उचित सरसफाइ कायम राख्न व्यवसायीहरूलाई निर्देशन दिइएको छ ।
कार्यक्रममा सहभागी व्यवसायीहरूले पनि उपभोक्ताको विश्वास कायम राख्न आफूहरू जिम्मेवार भएर अघि बढ्ने र प्रशासनको निर्णय पालना गर्ने प्रतिबद्धता जनाएका छन् । यता, उपभोक्ता हित संरक्षण मञ्चले प्रशासनको यो पहल सकारात्मक रहेको बताउँदै यी निर्णयहरूको प्रभावकारी कार्यान्वयन हुनुपर्नेमा जोड दिएको छ ।
प्रशासनको यो सक्रियतापछि वीरगन्जको माछा–मासु बजारमा हुने ठगी नियन्त्रण हुने र उपभोक्ताले स्वच्छ तथा सही तौलको मासु पाउने विश्वास लिइएको छ ।
