वीरगन्ज-
संघीय मामिला तथा सामान्य प्रशासन मन्त्रालयले पर्सा जिल्लाका दुई नगरपालिका र तीन गाउँपालिकामा नयाँ प्रमुख प्रशासकीय अधिकृत खटाएको छ।
मन्त्रालयले बिहीबार देशभरका गाउँपालिका र नगरपालिकामा कार्यरत निमित्त प्रमुख प्रशासकीय अधिकृत हटाउँदै एकैपटक २१९ जना उपसचिव तथा शाखा अधिकृतको सरुवा गरेको हो।
यस निर्णयअनुसार, पोखररिया नगरपालिकामा उपसचिव प्रदर्शनी कुमारी र बदुरमाई नगरपालिकामा उपसचिव सागर शाहलाई प्रमुख प्रशासकीय अधिकृतको जिम्मेवारी दिइएको छ। दुवै जना यसअघि गृह मन्त्रालयमा कार्यरत थिए।
त्यस्तै, तीन गाउँपालिकामा शाखा अधिकृत खटाइएका छन्। कृष्णप्रसाद खतिवडालाई धोबिनी गाउँपालिका, मोहम्मद महफुज अहमदलाई छिपहरमाई गाउँपालिका र सरोजकुमार चौधरीलाई ठोरी गाउँपालिकाको प्रमुख प्रशासकीय अधिकृतको जिम्मेवारी दिइएको छ।
मन्त्रालयले भदौ १२ गते गरेको निर्णयअनुसार सरुवा कार्यान्वयनमा आएसँगै पर्साका पाँच स्थानीय तहमा नयाँ प्रशासकीय नेतृत्व आएको हो।
