वीरगन्ज –
भोटेकोशी बाढीबाट भएको ठूलो जनधनको क्षतिपछि नेपाललाई अन्तर्राष्ट्रिय समुदायबाट आर्थिक तथा मानवीय सहयोग जुट्न थालेको छ। पछिल्लो विवरणअनुसार विभिन्न देश तथा अन्तर्राष्ट्रिय संस्थाबाट करिब २८ अर्ब रुपैयाँभन्दा बढीको आर्थिक सहयोग घोषणा वा प्रतिबद्धता भएको छ। यद्यपि, उक्त रकममध्ये सबै नेपाल सरकारलाई प्राप्त भइसकेको भने होइन।
सबैभन्दा ठूलो सहयोगको प्रतिबद्धता विश्व बैंकले गरेको छ। विश्व बैंकले उद्धार, राहत तथा पुनर्निर्माणका लागि नेपाललाई २५ अर्ब रुपैयाँसम्मको आपत्कालीन सहयोग उपलब्ध गराउन सकिने जनाएको छ। विश्व बैंकको यो रकम तत्कालै नेपाल सरकारको खातामा जम्मा भएको नभई आवश्यकताअनुसार परिचालन गर्न सकिने सहायता हो।
त्यसैगरी, संयुक्त अरब इमिरेट्स (यूएई)ले बाढी तथा पहिरो प्रभावितका लागि १ करोड अमेरिकी डलर अर्थात् करिब १ अर्ब ४० करोड रुपैयाँ मानवीय सहायता घोषणा गरेको छ। यूएईका राष्ट्रपति शेख मोहम्मद बिन जायद अल नाह्यानको निर्देशनमा यूएई सहायता एजेन्सीमार्फत उक्त सहायता उपलब्ध गराइनेछ।
बेलायतले ५ मिलियन पाउन्ड अर्थात् करिब ९५ करोड रुपैयाँ बराबरको सहायता घोषणा गर्नुका साथै आपत्कालीन उद्धारकर्मी पठाउने प्रस्ताव गरेको छ।
अस्ट्रेलियाले ५ मिलियन डलर बराबरको मानवीय सहायता प्याकेज घोषणा गरेको छ। उक्त सहयोग प्रभावित समुदायका लागि आपत्कालीन आवास, खाद्यान्न, स्वास्थ्य सेवा तथा पुनःस्थापनामा प्रयोग गरिने जनाइएको छ।
त्यस्तै, दक्षिण कोरियाले १० लाख अमेरिकी डलर बराबरको मानवीय सहायता उपलब्ध गराउने जनाएको छ। कोरियाले उद्धार तथा विपद् प्रतिकार्यका लागि टोलीसमेत परिचालन गरेको छ।
अमेरिकाले ५ लाख अमेरिकी डलर आपत्कालीन सहयोग उपलब्ध गराउने तथा विपद् व्यवस्थापन विज्ञ पठाउने प्रतिबद्धता जनाएको छ।
भारत र चीनबाट नगदभन्दा सामग्री तथा आपत्कालीन सहयोग
नेपालका छिमेकी मुलुक भारत र चीनले पनि सहयोग अघि बढाएका छन्। भारतले बाढी प्रभावित क्षेत्रमा करिब ५० मेट्रिक टन राहत सामग्री पठाएको छ। यसमा अस्थायी आवास, कम्बल, स्वच्छता सामग्री, बत्ती तथा औषधिलगायत सामग्री छन्।
चीनले पनि नेपाललाई आपत्कालीन सामग्री तथा नगद सहयोग उपलब्ध गराउने जनाएको छ। तर चीनबाट घोषणा गरिएको नगद सहयोगको स्पष्ट कुल रकम सार्वजनिक भइसकेको छैन।
यसैबीच, नेपालका निजी क्षेत्रबाट पनि प्रधानमन्त्री दैवी प्रकोप उद्धार कोषमा सहयोग घोषणा भइरहेको छ। ग्लोबल आइएमई बैंकले ५ करोड रुपैयाँ सहयोग घोषणा गरेको छ।स्रोत : विभिन्न सञ्चारमाध्यममा प्रकाशित समाचारहरू।
