वीरगन्ज-
पर्सा जिल्लामा आजदेखि माध्यमिक शिक्षा परीक्षा (एसईई) सुरु भएको छ । यस वर्ष जिल्लाभरका २९ परीक्षा केन्द्रबाट ११ हजार ४१३ विद्यार्थीले परीक्षामा सहभागीता जनाएका छन् ।
शिक्षा विकास तथा समन्वय इकाई पर्साका अनुसार परीक्षालाई मर्यादित र व्यवस्थित बनाउन कडा नियम लागू गरिएको छ । परीक्षा केन्द्रमा मोबाइल फोन र अन्य विद्युतीय उपकरण लैजान पूर्ण रूपमा निषेध गरिएको छ ।
आज पहिलो दिन अनिवार्य अङ्ग्रेजी विषयको परीक्षा सञ्चालन भएको छ । परीक्षा बिहान ८ बजेदेखि ११ बजेसम्म सञ्चालन भएको थियो ।
इकाई प्रमुख उपसचिव हरि राउतले परीक्षालाई मर्यादित बनाउन कुनै कसर बाँकी नराखिने बताए । उत्कृष्ट रूपमा केन्द्र सञ्चालन गर्नेहरूलाई पुरस्कृत गरिने र लापरबाही गर्नेहरूलाई कारबाही गरिने उनको भनाई छ ।
पर्सामा १७ वटा परीक्षा केन्द्र वीरगञ्ज महानगरपालिकामा र १२ वटा केन्द्र अन्य १३ वटा स्थानीय तहमा रहेका छन् ।
