वीरगन्ज-
जनता समाजवादी पार्टी (जसपा) नेपालका राष्ट्रिय अध्यक्ष उपेन्द्र यादवको प्रभाव मधेश प्रदेशमा कमजोर हुँदै गएको छ। जिल्ला अधिवेशनहरूमा उनले रुचाएका नेताहरू अध्यक्ष पदमा जित्न नसक्दा उनको नेतृत्वमाथि आन्तरिक चुनौती देखिएको छ। मधेश प्रदेशका धनुषा, सर्लाही, रौतहट, बारा र सिरहामा यादवको इच्छाविपरीतका नेताहरूले जिल्ला अध्यक्ष पदमा विजय हासिल गरेका छन्।
धनुषा जिल्ला अधिवेशनमा अध्यक्ष यादवले सत्रुधन यादवलाई समर्थन गरे पनि पशुपति यादव झिनो मतान्तरले अध्यक्षमा निर्वाचित भए। पशुपति तेस्रो पटक अध्यक्ष बनेका छन् र उनले नेपाली कांग्रेसका प्रभावशाली नेताहरूसँग पनि सम्पर्क राखेका छन्। यस्तै, सप्तरीमा हुने अधिवेशनमा पनि यादवलाई आफ्नो पक्षमा समर्थन जुटाउन कठिनाइ भइरहेको नेताहरूले बताएका छन्।
पार्टीभित्र बाहिरी रूपमा यादवको विरोध नदेखिए पनि उनको इच्छाविपरीतका गतिविधिहरू बढिरहेका छन्। विगतमा मधेश प्रदेश अध्यक्षहरू रेनु यादव, विजय यादव र रामबाबु यादवलाई बर्खास्त गरेर बालकेश्वर यादवलाई जिम्मेवारी दिए पनि उनलाई नेताहरूले स्वीकार गरेका छैनन्।
मधेश र लुम्बिनी प्रदेशका आगामी अधिवेशनमा यादवलाई ठूलो धक्का लाग्ने सम्भावना छ। पार्टीमा फरक मत राख्नेहरूलाई निष्कासन गर्ने उनको शैलीका कारण नेताहरू खुलेर विरोध गर्न हिचकिचाए पनि भित्रभित्रै संगठित चुनौती दिन थालेका छन्। अर्थमन्त्री रहेका सञ्जय यादवसमेत अहिले पार्टीमा ओझेलमा परेका छन्।
यादवले सोमबार मोरंग जिल्ला अधिवेशनको उद्घाटन गर्दै संघीय लोकतान्त्रिक गणतन्त्रलाई संस्थागत गर्नुपर्नेमा जोड दिए। उनले भ्रष्टाचार, कमिशनतन्त्र र विचौलियाको नियन्त्रण गरी सुशासन कायम गर्न सरकारको ध्यानाकर्षण गराए। यस्तै, पूर्णसमानुपातिक निर्वाचन प्रणाली लागु गर्न सुझाव दिए।
पार्टीका सहअध्यक्ष रकम चेम्जोङले राजतन्त्र फर्किन नसक्ने बताए भने महासचिव रेखा यादव र पूर्वमन्त्री जयराम यादवले संघीय लोकतान्त्रिक गणतन्त्रको विकल्प नरहेको उल्लेख गरे। तर, पार्टीभित्रको आन्तरिक विद्रोहले जसपा नेपालको भविष्य अनिश्चित बन्दै गएको छ।
