काठमाडौं –
प्रधानमन्त्री केपी शर्मा ओलीले मनसुनजन्य विपद्बाट जोगिन सतर्कता अपनाउन र अत्यावश्यकबाहेक लामो यात्रा नगर्न समस्त देशवासीलाई अनुरोध गरेका छन्। जल तथा मौसम विज्ञान विभागले आज दिउँसो देशका विभिन्न स्थानमा भारी वर्षा हुने अनुमान गरेको सन्दर्भमा उनले सामाजिक सञ्जालमार्फत यस्तो आह्वान गरेका हुन्।
प्रधानमन्त्री ओलीले सामाजिक सञ्जालमा लेखेका छन्, “शुभ बिहानी! मौसम विज्ञान विभागले आज दिउँसो देशका विभिन्न स्थानमा भारी वर्षा हुने अनुमान गरेको छ। मौसमजन्य विपद्बाट बच्न सुरक्षा निकायले आवश्यक सतर्कताका लागि जारी गरेको सूचनालाई पालना गरौँ। अत्यावश्यकबाहेक लामो यात्रा नगर्न र सुरक्षित स्थानमा रहन अनुरोध गर्दछु। सुरक्षाकर्मीलाई आवश्यक सुरक्षाको तयारी अवस्थामा रहन निर्देशन गर्दछु।”
जल तथा मौसम विज्ञान विभागले जारी गरेको विवरणअनुसार भारी वर्षाका कारण बाढी, पहिरो र डुबानको जोखिम बढेको छ। विभागले सर्वसाधारणलाई सुरक्षित स्थानमा रहन र जोखिमयुक्त क्षेत्रमा यात्रा नगर्न आग्रह गरेको छ। प्रधानमन्त्री ओलीले पनि सुरक्षा निकायलाई सतर्क रहन र आवश्यक तयारी गर्न निर्देशन दिएका छन्।
मनसुन सक्रिय भएसँगै देशका विभिन्न स्थानमा बाढी र पहिरोका कारण सडक अवरुद्ध भएको र जनजीवन प्रभावित बनेको सन्दर्भमा यो आह्वान आएको हो। सरकारले विपद् व्यवस्थापन र उद्धारका लागि आवश्यक तयारीलाई तीव्रता दिएको जनाइएको छ।
