काठमाडौं –
भोटेकोशीमा आएको विनाशकारी बाढीले ठूलो जनधनको क्षति पुर्याएपछि त्यसबाट सिर्जित संकटको सामना र प्रभावित क्षेत्रको उद्धार तथा पुनःस्थापनाका लागि राजनीतिक सहकार्यको रणनीति बनाउन सत्तारुढ दल राष्ट्रिय स्वतन्त्र पार्टीका सभापति रवि लामिछानेले आह्वान गरेको सर्वदलीय बैठक सिंहदरबारमा सुरु भएको छ।
बुधबार भोटेकोशीमा आएको भीषण बाढीले तल्लो तटीय क्षेत्रमा ठूलो क्षति पुर्याएपछि तत्कालीन उद्धार, राहत तथा पुनःस्थापनाका साथै आगामी दिनमा यस्ता विपद्बाट हुने क्षति न्यूनीकरणका उपायबारे बैठकमा विस्तृत छलफल हुने बताइएको छ।
बैठकमा लामिछानेसहित प्रमुख राजनीतिक दलका शीर्ष नेताहरू सहभागी छन्। नेपाली कांग्रेसका सभापति गगन थापा, नेकपा एमालेका महासचिव शंकर पोखरेल, नेपाली कम्युनिस्ट पार्टीका संयोजक पुष्पकमल दाहाल, राष्ट्रिय प्रजातन्त्र पार्टीका अध्यक्ष राजेन्द्र लिङदेन, जनता समाजवादी पार्टी नेपालका अध्यक्ष उपेन्द्र यादव तथा नेता महन्थ ठाकुरलगायत नेताहरू बैठकमा उपस्थित छन्।
बैठकमा बाढी प्रभावित क्षेत्रमा तत्काल खोज तथा उद्धार अभियान प्रभावकारी बनाउने, राहत सामग्री र आवश्यक जनशक्ति परिचालन गर्ने तथा विस्थापित नागरिकको व्यवस्थापन गर्ने विषयमा छलफल हुने जनाइएको छ।
त्यस्तै, बाढीबाट क्षतिग्रस्त सडक, पुल, जलविद्युत् आयोजना तथा अन्य भौतिक संरचनाको पुनर्निर्माण, प्रभावित परिवारलाई राहत तथा क्षतिपूर्ति उपलब्ध गराउने र जोखिमयुक्त क्षेत्रमा आगामी दिनमा अपनाउनुपर्ने पूर्वतयारीबारे पनि बैठक केन्द्रित हुने बताइएको छ।
भोटेकोशीमा आएको बाढीले विपद् व्यवस्थापन तथा पूर्वसूचना प्रणालीको प्रभावकारितामाथिसमेत प्रश्न उठाएको छ। त्यसैले हिमाली क्षेत्रमा नदी थुनिएर बन्ने ताल, आकस्मिक बाढीको जोखिम र त्यसको पूर्वसूचना प्रणालीलाई थप बलियो बनाउने विषयमा राजनीतिक तहबाट साझा धारणा निर्माण गर्ने प्रयासका रूपमा पनि बैठकलाई हेरिएको छ।
संकटको घडीमा दलहरूबीच सहकार्य र समन्वय बढाएर उद्धार तथा राहतलाई प्रभावकारी बनाउने उद्देश्यले बैठक बोलाइएको हो। बैठकले बाढीबाट प्रभावित नागरिकलाई तत्काल राहत पुर्याउनेदेखि दीर्घकालीन पुनःस्थापनासम्मका विषयमा साझा पहलको बाटो तय गर्ने अपेक्षा गरिएको छ।
