ऊर्जा जलस्रोत तथा सिंचाईमन्त्री दीपक खड्काले पञ्चेश्वर जलविद्युत आयोजना चाँडै अगाडि बढ्ने बताउनुभएको छ ।
बुधवार तीन दिने भारत भ्रमण सकेर स्वदेश फिर्ता हुनुभएका ऊर्जामन्त्री खड्काले यस्तो बताउनुभएको हो । उहाँले भारत सरकारसँग पञ्चेश्वर जलविद्युत आयोजना चाँडै अगाडि बढाउने विषयमा सहमति भएको बताउनु भयो । उहाँले नेपाल र भारतबीचमा आयोजना अगाडि बढाउने विषयमा रहेका असहमतिलाई एक आपसमा समन्वय गरी तत्काल अगाडि बढाउने विषयमा दुई देशबीच सहमति भएको उल्लेख गर्नुभयो ।
उहाँले भारतले पञ्चेश्वर लगायतका अन्य अरुण तेस्रो तथा तटबन्ध देखि सिंचाई र ऊर्जाको क्षेत्रमा आवश्यकताअनुसार अझ बढी सहयोग गर्ने प्रतिवद्धता जनाएको जानकारी दिनुभयो । उहाँले भारतले नेपालको विषयमा धेरै चासो र चिन्ता लिएको पाएको बताउनु भयो ।
मन्त्री खड्काले तीन दिने भारत भ्रम्रण उपलब्धीमुलुक भएको जानकारी दिनुभयो । उहाँले नेपाल सरकारले २०३५ सम्म २८ हजार ५ सय मेगावाट विद्युत उत्पादन गर्ने लक्ष्यलाई कसरी परिपूर्ति गर्ने भनेर भारतका ठूला व्यवसायी र संस्थाहरुसँग छलफल समेत भएको बताउनु भयो ।
उहाँले जलविद्युतमा लगानी र काम गर्ने वातावरण बनाउन थप आवश्यकता रहेको बताउनु भयो । उहाँले काम गर्ने वातावरण भए नेपालमा भारतका मल्टिपल कम्पनीहरु नेपालको जलविद्युतका काम गर्न उत्साहित देखिएको बताउनु भयो ।
